عارف..

شعور انك تبقى في مكان في كمية ناس وزحمة وبتاع وتلاقي (حد) داخل يدور عليك انت شخصيا وعمال يخترق الناس ويسلم عليهم ويتجاوزهم في مجاملة سريعة علشان يوصل لك.. ويفضل بقى واقف جنبك طول الوقت..

عارف لما تبقى في لحظة بائسة ومش بتكلم حد وربنا عالم بحالك تلاقي في نفس اللحظة (حد) يقوم باعتلك رسالة : مالك ؟ طمني عنك؟ انا قلقان عليك..

عارف لما تكون قافل من الدنيا وترد عالتليفونات عادي تتكلم وتهرج ويتمصلحوا عليك شويه.. بس في (حد) معين اول ما يسمع صوتك يسألك مال صوتك؟ تقول له مفيش.. بعد نصايه تلاقي الباب بيخبط واول ما تفتح ياخدك حضن وهمي كده تحس كأنك كنت مسافر ورجعت..

عارف لما يكون عندك يوم مهم في حياتك وكل الناس مترقبه اليوم ده وبتعرض مساعدتها وانت عمال بتجهز ومحتاس ، بس في النص كده في (حد) متابع أدق التفاصيل ورايح جاي عليك بمكالمات ورسايل ومشاوير.. وبعدين قبلها بيوم وانت مزنوق ومش طايق تشوف حد أساسا تلاقيه واقف عالباب بتورتايه وورد وكارت وانا جاي اباركلك بدري ومتقلقش كل حاجه هتكون كويسة.. :)

عارف لما تبقى بتتكلم عادي وفي وسط الكلام تقول ان نفسك في أكلة معينة من مكان معين وتاني يوم تلاقي (حد) بيكلمك يقولك انا طالع اديك حاجه من عالباب.. :)

عارف لما تبقى مقصر في حق (حد) او غلطان حتى في حق ال (حد) ده ورايح مكان هو فيه ومكسوف عينك تقع في عينه وبعدين تلاقيه هو اللي بيجري عليك ويحضنك ويفرح بيك ويشيلك كده من عالأرض شيل..

عارف لما تبقى في (حد) مشفتوش في حياتك ولا متوقع انك تشوفه ابدا بس بتحبه بقى جدا جدا وسبحان الله يقدر ربنا تتقابلوا.. تلاقيه مشتاق لك وتلاقيك متعود عليه كأنكوا متربيين مع بعض..

عارف ال (حد) اللي بيفرح لفرحتك كأنه هو اللي حصلتله الحاجه اللي تفرح.. وبيتمنالك الخير قبل نفسه.. وبيزعل علشانك اكتر منك..

عارف ال (حد) اللي مهما طنشته بيسأل عنك ومهما عاملته بغتاته بيفضل يحبك.. واي وقت احتجتله بتلاقيه جنبك..

عارف..

إخواننا أحب إلينا من أنفسنا ♡